नियमित खोप छुटेका बालबालिकालाई बैशाखदेखि दिइने

काठमाडौं । नियमित खोपबाट बञ्‍चित भएका बालबालिकालाई बैशाखदेखि लगाइने भएको छ। पोलियो, दादुरा, हेपाटाइटिस बि, लहरेखोकी, धनुषटंकार, निमोनिया र जापानिज इन्सेफलाइटिसलगायत विरुद्धको  नियमित खोप नपाएका बालबालिकालाई बैशाखदेखि दिने भएको हो।

स्वास्थ्य सेवा विभाग परीवार कल्याण महाशाखाअन्तर्गत खोप शाखाले बैशाखदेखि खोप लगाउन छुटेकालाई खोप दिइने बताएको हो । खोप शाखा प्रमुख सागर दाहालले नियमित खोप अभियानमा खोप लगाउन छुटेकालाई उनीहरुको हिस्ट्री हेरी खोप दिइने बताए । उनले भने, ‘केहि बालबालिकाहरु नियमित खोप अभियानमा छुटेका छन् । छुटेका बालबालिकालाई बैशाखदेखि नियमित खोप अभियान समेट्छौं । यस्तै, टाइफाइड खोप लगाउँदा उनीहरुको हिस्ट्री र रेकर्ड हेरेर खोप उपलब्ध गराउँछौं । ‘

कोरोना संक्रमणका कारण नियमित खोप अभियान प्रभावित बनेको थियो । बालबालिकालाई सरूवा रोगहरुविरुद्ध सुरक्षा प्रदान गरी बिरामी दरमा कमी ल्याई शिशु तथा बाल मृत्युदर घटाउन सरकारले नियमित खोप अभियान संचालन गर्दै आएको छ ।