सुरुगर्यो नेपालले भारतलाई बिजुली निर्यात

नेपालले भारतमा विद्युत निर्यात सुरू गरेको छ। पहिलो चरणमा ३९ मेगावाट विद्युत निर्यात गरिएको प्राधिकरणका प्रवक्ता सुरेशबहादुर भट्टराईले बताए।

उनका अनुसार आज १२ बजे रातिदेखि ढल्केबर-मुजफ्फपुर ४०० केभी अन्तरदेशीय प्रसारण लाइनबाट विद्युत् निर्यात सुरू गरिएको हो।

‘हामी विस्तारै निर्यात बढाउँदै लैजान्छौं। क्रमशः ४५६ मेगावाटको माथिल्लो तामाकोशी, ६९ मेगावाटको मस्र्याङ्दी तथा ४५ मेगावाटको माथिल्लो भोटेकोसी विद्युत गृहबाट पनि भारतीय बजारमा बिजुली पठाउने तयारी गरेका छौं,’ उनले सेतोपाटीसँग भने।

अब प्रत्येक दिन बिहान १० बजेदेखि दिउँसो १२ बजेसम्म एक्सचेन्ज बजारमा विद्युत् बिक्री हुनेछ।

विद्युतको प्रतियुनिट बिक्री दर मार्केट क्लियरिङ प्राइसका आधारमा तय हुने प्राधिकरणको भनाई छ। दिनमा २४ घण्टा विद्युत् निर्यात हुनेछ। एक्सचेन्ज बजारको कारोबार एनटिपिसी विद्युत् व्यापार निगम (एनभिभीएन) ले गर्नेछ ।